Mei Taille

Die Wuch honn eich vor meinem Klääreschrank gestann unn gesucht. Deerscht harr eich e Buchs aan, die is ue nitt meh zu gang. Ue honn jo ball zehn Zentimeter gefehlt. Bei de zwäät Buchs et selwe. Bei de dritt genauso unn nor die viert is halweswäächs zugang, awer nor weil die e Gummizuch uff jeder Seit hatt’. Do honn eich et mol mit de Reck proweert, do wars jo grad so! Die sinn all ue nitt meh zu gang, ob Knopp or Reisverschluss. Eich war fix unn fertisch, sinn in’d Bad, honn meich uff die Wooh gestellt. Mei Gewicht harr eich gehall. Dunnerkeil, wat is dann do passeert. Eich honn dat schwarz Kostim eraus gehult. Do wars genau so! Dat hell far et Friehjohr honn eich nor zu braacht, weil im Kreiz e Gummizuch drinn war. Nor die fällische Klääre honn gepasst. Eich war außer mer! Honn mer e Herz gefasst unn et Bandmoß gesucht. De Bruschdumfang war deselwe, die Hift aach, awer mein Taille war fort. Verschwunn wie die Worschd vum Deller. Mei scheen schmal Taille war nitt meh uffsetreiwe. Die Gertel honn eich all proweert, do härre eich misse Löcher ninn mache, wo gar kää Gertel meh is. Du allmächtisch Käth, wie is dat dann komm? Eich honn mei Mitte verlor. Klammhämlich. De Herbschd war die noch uff ehrm Platz, jetz is mei Mitte fort. Eich muschd an die Grumbeeresäck denke, wenn ma do e Koreb voll eninn geschutt hott, hott dat aach alsemol geklemmt. Unn wenn ma die hoch gezoh hott unn geschierelt, war die Walljer fort. Awer wer soll meich hoch ziehe unn schierele. Wer wääß obs helfe dät. Eich kennt heile, meiner Taille heil eich noh, an der honn eich gehong. Die war mer wichtisch unn awei is die fort! 

Eich muss auch doch emol im Vertraue frohe, is loh jinn noch e Fraamensch wo‘s aach so gang is? Der braucht ma dat jo nitt vor all de annere se sahn.

Eich warte drauß, do kennt der ma Beschääd gänn. Hoffentlich stehn eich nitt allän do, ohne Taille, eich wär froh wenn‘s Weibsleit gäb, wo‘s aach so kam.

Wo aach uffemol ohne Taille do gestann honn. Iewer Naacht sinn eich zur Kaschdeforem wor! Mei scheen Taille ...